RESSAS | THE SECRET SOUL

#جبل_الرصاص.. الجبل العظيم, الجبل الشامخ هذا اللي مسّ روح كلّ إنسان مشالو سواء خيّم فيه أو طلع للقمّة و روّح.. مافمّاش إنسان يقول عكس أنّو الرصاص فيه هيْبة ربّانية كبيرة و عجيبة.. جبل تحسّوا صورة عكسيّة لكل واحد فينا.. صورة متاع الخوف اللي يواجه التّحدي & و التّعب اللي يواجه العزيمة.. قصّة تناقض كبيرة نعيشوها كي نكونوا بين الحجر و الكسوحيّة متاعو.. المرّة هذه موش كيما المرّات اللي عشناهم مع بعضنا في الرّحالة في رحلة المشقّة نحو القمّة مباشرة.. المرّة هذه حبّينا التّجربة تكون تحت عنوان " RESSAS | THE SECRET SOUL".. ترجمها كيما تحب الروح المخفيّة الدّفينة السّرية مايهمّش.. لكن المهمّ و الأهمّ أنّو تجربتنا هذه باش تكون إستثنائية: باش نتعمّقوا و نستكشفوا قلب الرصاص أكثر.. هاك الروح الدخلانيّة اللي ينبض بيها الجبل.. باش ندخلوا لكلّ داموس ماجاش لبالك هو موجود أصلا أو مانجّمتش تتشجّع تدخلوا قبل أو حتّى ممكن تكون هذه أوّل مصافحة ليك مع الرصاص و باش تدخلها من الباب الكبير و أحنا مانجّموا كان نشجّعوك و ندزّوك باش تغامر..